Om oss
Kunsten å laga tønner er utdøyande, men på Tønnegarden er det storproduksjon! Her har me eit flott visningssenter i nye lokaler. I ny verkstad tilbyr bøkkaren omvisning i tønnefabrikken. Her får du sjå handverkaren i arbeid og ei unik innføring i bøkkerkunsten. Kunnskap og handtverk har vore overført frå slektsledd til slektsledd, i alt 5 generasjonar. Jostein og Oddvar er dei to som i dag produserer tønnene og held liv i den gamle tradisjonen.
Me har òg lyse og trivelige lokaler for selskap. Her kan du få ei tradisjonell matoppleving med deilig steinomnsbakt brød, lunsj eller middag frå vår meny.
På Tønnegarden møter du mellom andre
Jostein
Kari
Solveig
Oddvar
Steinomnen
Steinomnen på tunet er ein stor og god omn med plass til mykje. Denne har vore brukt til å bake brød, pizza, langtidssteika kjøt og anna godt. Det er plass til omlag 40 brød i kvar omgong, og omnen kan fyllast fleire gonger på ei fyring.
Me tek gjerne imot grupper for pizzasteiking etter avtale.
Tradisjonsmat
Bløytelefser og rauddravle er tradisjonell mat her i distriktet. Lefsene vert kjevla tynne, steikt på takke og oppbevart tørre. Når dei skal etast vert dei bløytt i vatn og smurd med smørkrem eller anna.
Rauddravlen er Fusa sin eigen og er utruleg god. Den skal vere «slett», altså utan klumpar. Den er ganske søt og vert servert kald. Oppskriftene rundt om kan variere, men hos oss vert det brukt ei gamal oppskrift her frå området. Mjølka kjem frå våre eigne kyr som gir oss god mjølk til dette og anna mat.
Kjem du til Tønnegarden kan du gjerne få servert mat frå utvalet av tradisjonsrettar.
Me driv òg med kortreist mat i form av mjølk- og kjøttproduksjon. Av mjølka lagar me mellom anna rauddravle og lefser. Når kyrne nett har fått kalv får me råmjølk. Mjølka som ikkje kalven drikk brukar me til å lage råmjølkspudding, kjeks og mjølkekaker. Kjøtet av Vestlandsk fjordfe brukar me i kjøttkaker og kjøttdeig.
Vestlandsk Fjordfe er ein gamal storferase som har vore utrydningstrua, men som no har fått ny renessanse på grunn av det smakfulle kjøtet, og at nokon har sett verdien av å ta vare på dei gamle rasane.
Me fokuserer på at dyra våre har det godt for å få best mogeleg kvalitet. På sommaren får dei gå ute i det fri. Frisk luft og mykje godt gras, gir god mjølk og smakfullt kjøt.
